Misie Premie Minis,

Depi mo patron in trouve mo fin tro vie pou travay, mo res lakaz. Mo fatige tou le zour nek get soley leve, pass lor mo latet avan li al dourmi.

Sel ti distraksion, se get tanzantan poul grate dans lakour. Mo tia bien kontan amenn mo bolfam promne enn de foi, get nou zoli lamer Moris avan bann lotel bar tou, ousoi kikfoi al get sa bann grand bildin mo tann dir zot fine konstrir dan Iben sitan li gran ou tia kapav netoy niaz. Mais pa inn ressi fer sa lakoz kass nayba.

Kan eleksion inn vini mo pa ti la ar sa. Me kan mo finn tann ou koze lor sa zafer transpor pou vie dimoun, monn fini kompran ki ou tou sel konn saler nou karay. Mo finn monte desan pou eksplik sa programm la tou mo fami ek mo voizin. Zot tou finn vinn vote assam ar moi, gran matin boner. Enn sel pa ti dakor, se mo frer, so garson. Li dire koumsa, li fin, dimann enn ogmantasion 300 roupi so patron. Lontan li ti pe gaign 24 900 roupies.

Depi de moi sa finn vinn 25 200 roupi. Li dir asterla li bizin al diman so patron tire sa 300 roupies la pou li pa gaigne lamerdma avec incomtax.

Ou kone, 100 zour sa bien long pou enn vie dimounn kouma moi. Alor dir moi vitman kot mo kapav al tir sa ticket bis la pour mo al vakarn-vakarne tigit avec bonfam la. Mo frer ki ti travay dan gouvernma ape rod van so ti loto.

Ler mo diman li lakoz, li repon moi nepli serti gard sa masinn la, aster nou pou kapav al partou dan Moris gratis. Namaste babou.

■ Kredul