Père Grégoire pe rasanble tou bann Kreol dans FCM pou revendik zot droi konsernan travay, promotion lozeman, ledikation, nomb representan dans Lasamble national ek lezot institution, etc. Dans lansam, lepep morisien pe akeir so linitiativ bien favorableman. Nou bann lezot kominote pena narien kont, se so droi en tant ki Kreol.

Pou sa li finn gagn gran gran ?koverage? dans lagazet ek radio prive. Li finn mem gagn bann lemision spesial pandan «Peakhours» dan bann radio prive et tou kominaute kreol finn exprim zot en faver so mouvman.

Me se ki pa korek ditou se kan dan enn pase pa tre lointin kan enn bann mouvman kouma Tamil Telegu Marathi (TTM) dirize par feu Raj Virahsawmy, Hizbullah par Cehl Meeah, Tamil Council par D. Kanaksabee, Hindu Council ek lezot ankor ti pe defan droi zot kominote lor enn nivo parey, sa bann mem la gazet kouma «l?express», Le Mauricien, Week-end, etc. ti kalifie zot de racis, secter, kominalis, semer divizion dans lepep morisien, nation larkensiel. Pir enkor kan Voice of Hindu, Hindu House fer mem zafer ki Federasion kreol morisien, samem lapres ki pe kouver Per Gregoir la tret de tout sort de move tit kouma Protez Montagn. Pli pire enkor zot pa gagn sa kantité koverej-la ou ene move koverej ki fer lapopilasion kroir ki bann mouvman secter, racis pe leve.

Mais pou FCM, li toutafe le kontrer, pas zot pou bann bienfaizan qui ena tou lezitimite neceser. Faude pa zot blié ki dan bann lezot kominote ousi ena bann gran gran intelectiel, bann gran group reflexion dan sa pei-la ki faire gran deba lor sosiete morisiene. Dan radio prive ousi mem zafer.

Aster mo kroir ki la popilasion pe dekouver zot vre visaz, move rol ki zot pe zoue. Zot pou dir ou ki sa zot lagazet, sa zot radio, sa ki zot anvi zot dir ou ki zot invit sa ki fer zot plezir. Me pa blie ki nou pe viv dans enn pei multirasial nou tisi sosial bien frazil et lemond zot lizie bien lor nou sirtou apre sa ki pe pase dan Zimbabwe. Zot ena enn gran responsabilite anver bann lezot kominote parski pa zis Kreol ki aste zot lagazet ek ekout zot radio ki soi-dizan indepandan. Dayer pa seleman bann firm ki apartenir a kominote kreol ki finans zot atraver piblisite payan ek patronn zot lorganizasion dan bann aktivite pou zot kapav gagn zot lavi.

Nou kompran qui zot pe defan zot kominote me ena ladesans pran enn non sectaire pa trike kasiet derier enn nom national. Zot rol tou popilasion kone aster.

Mo pense qui Leta bizin vey sazafer la de trepre et montre li bien vizilant par lintermedier Independent Broadcasting Authority pou ki aster et dan lavenir ki tou mouvman ou associasion qui lit en faver zot kominote gagn mem treteman couma Federasion Kreol Morisien ek Père Grégoire, ek non pa tret zot de secter, racis, kominalis ek tout sort non denigran, sinon li pour enn move presedan, enn move signal ki pou kapav fer boukou plis ditor ki dibien dans sa pei-la.

Moi, mo ena kouraz ekrir mo lopinion gete aster si zot ena kouraz pou publie, parski dan lepasse boukou foi monn ekrir lor bann size ki tous nou sosiete me zame finn piblie. Repon aster.

Deven VALAYDEN

P.S. Mgr. Piat dan so let pastoral kapav vinn koz lor lapovrete, malez social, ledikasion et lot enkor, sa li ti gagn droi. Me kan ene hom relizie enn lot kominote pronons zot lor enn mem problem zot dir li pe fer politik li bizin okip so la relizion. Pa pran nou pou bann imbesil.