Akoz enn «manz bondié kaka diab», banla pé tir so manzé, dévir so bol dhal, rant dan so vant, zonn pli ofansé ki bondié

Matelo, ou pa trouvé pé rod fer bourik manz lazlé, kot nou pé alé ?

Dimounn-la pa gagn drwa pous enn dialog san ki, koumma enn kabri Rodrigues, zot nek soté ?

Mo nani si ti la ti pou dir : «Apel sa rod lipou poul dan f** kok likou touni.» Bé kan péna rol, pran dé bar savon glissé, sayé

Lerla pou al koz napa tou, micro ti krwar linn gagn variole du singe, aret badiné dans ler zoué, bann dépitées

Ti koson pé riy néné so mama, pé dir racis sipakiété

MBC pa bizin dir ou, pé kalkilé mem koumma pou met choula, alim difé

Pa pran Morisien pou piago, pou kinton, ena problem ki pli grav dan sa péi-la, prix, skandal, «sniffing» «survey», nanyé nou pa pé bliyé

Koumma dir péna dossié inportan pou trété, kontriab pé pey pou enn bann lamoné zété, ek nou kas pé kalé-pilé

Pandan ki zot pé al promné, pé bangolé, nou nou pé riss diab par laké, ziss nou ek bondié ki koné

Pa vinn montré vié, zenn zako nanyé fer grimas, sinon, atann zot pou gété…