<B>Nou sime pe separe !</B>

Sori Jocelyn! Mo nepli konpran ki to pe rod fer. Bann AfroKreol ti bien bizen enn lider eklere ki ti pou amenn zot ver later promiz. Me kouma enn brouyar epe finn leve mo nepli trouv enn berze devwe pe okip so troupo. Kikfwa mo?nn gagn katarak!

To kone, mo ena enn vwazen. Sak fwa mo dimann li vinn donn enn koudme pou kwi enn gato spesial pou nou partaze ar tou dimoun ki partisipe li reponn ki li pa trouve kifer li bizen partisipe dan kwi gato kan dan borlamer pe donn briyani ek diven kado. Pa bizen sarye lakrwa. Nek met lakrwa kot bizen. Me ler tanto vini, balot-balote, li araze, tap koutpwen lor laport. Li reklam so par gato. Li dir se so drwa sa. Mo pa tro konpran. Sirman kouma mo bann, mo plis ki pagla. Mo sirman enn veritab gopia; enn BACHARA an let kapital. Koumadir mo tann mo vwazen dir: ?Sa enn move kominalis sa! Li rod pran tou pou li.? Erezman mo ena enn lot vwazen ki kontan dir: ?Bef divan nou laport nou pa trouve me nou trouv fourmi laba lor montagn.?

Kominote plis dan pens se pa bann Kretien ousa EroKreol. Se bann AfroKreol ki reprezant 25% popilasion Moris. An gran mazorite zot dan proletarya, souproletarya ek loumpennproletarya. Kifer? Kifer zot finn tase dan langrenaz soudevlopman? Pourtan zot pa bet. Pourtan zot ena boukou talan. Kifer mobilite sosial finn boud zot devlopman? Kisannla responsab? Nou tou enpe responsab me bann pli gran responsab se bann lider politik, ekonomik ek relizie ki finn toultan mont dadak lor zot ledo. Pou detourn latansion zot fer bann AfroKreol kwar ki zot soufrans li koze par bann ki sorti Lenn, bann 22 kouma koze la dir.

Aster twa Jocelyn, to pe rod fer zot kwar ki si met ennde EroKreol dan bann pos senbolik zot desten pou sanze. Vrememsa: Bef divan to laport to pa trouve me to trouv fourmi laba lor montagn. Kan dapre twa enn AfroKreol pou vinn levek?

Bann AfroKreol finn donn nou pei enn extra zoli kado presie: NOU LANG NASIONAL. Program PREVOKBEK finn prouve ki literesi dan lang maternel, Kreol Morisien, permet zanfan aprann lir, ekrir, konte e metriz Lang ofisiel Repiblik Moris, Angle. Olie tom dan demagozi anou met presion pouki program PREVOKBEK vinn program literesi nasional. Sa pou fer zanfan Repiblik Moris anzeneral e zanfan AfroKreol anpartikilie sorti dan marenwar.

Kriz alimanter pe fons drwat lor nou atout vites. Pa ekout palab ki dir ki travay later pa finn fer pou AfroKreol. Nou pei finn vinn seki li ete parski bann esklav ek zot desandan finn ranz baz nou devlopman. Zordi bann problem nouvo ? global warming, resesion ekonomik mondial, kriz lenerzi ets. - pe obliz nou tras enn nouvo stratezi devlopman. Dan sa nouvo proze la, later ki pou zwe enn rol dominan. Nou pou bizen nasionaliz enn parti later pou akseler prodiksion alimanter atraver bann laferm entegre ek bann kooperativ otozere. Lavenir lepep Repiblik Moris li pa dan IRS me dan sekirite alimanter. Sa pou, anmemtan, permet nou koriz erer lepase parski dan kalkil konpansasion ti bliye bann esklav libere ek zot desandan. Later pou vinn rasinn ek disan dinite bann AfroKreol.

Met presion pou ki EQUAL OPPORTUNITIES ek EGALITE JENNDER vinn enn realite. Bizen ki bann lider ek lepep AfroKreol konpran lenportans ledikasion dan zot lamars ver dinite e devlopman. Me si bann lider la vinn bann roder-bout, zot pou gagn zot bout me lamas pou kontinie res deryer midi.

Pa tous to Dimans, Jocelyn? Si mo konpran bien, to pe dimann ki ferm erport toule Dimans; bizen ferm lepor, bann lotel, bann restoran; tou bis ek taxi bizen res dan garaz. Bann komann irzan dan zonnfrans bizen atann Lendi. Tansion bann amater Lendi Kordonie proteste kont obligasion travay dan Lendi. Lerla kees lor twa.

Mo ti kwar to program pli serye ki sa. Sori, mo matlo. Nou sime pe separe. Mo pa pou souet twa bonn kontiniasion dan ganndol. Mo zis sagren ki ankor enn rev pe vinn kosmar.

Salam!

Dev VIRAHSAWMY</B>