Guvernman Ramgoolam finn kareman minn sistem Pansyon Vyeyes Iniversel existan, avek baton Dinamit, e finn poz enn seri bom-a-retardman ki pu eklate kont lamas dimunn dan lavenir.

Sa, li atak frontal kont klas travayer, dan limedya e pu lavenir, si nu pa reysi, ansam, bar li.

Li enn atak kont klas travayer dan so sans larz. Sa vedir li enn atak kont tu dimunn ki travay pu viv: seki finn travay pu viv, seki pe travay pu viv, e seki e pu travay pu viv.

Dan bidze lane deryer, setadir tutswit apre viktwar 60-0 sa «Lalyans Changement» Ramgoolam-Bérenger-Duval-Subron kot li ti eli 60-0 lor enn promes elektoral pu ogmant pansyon vyeyes, ti vinn avek enn premye atak kont pansyon vyeyes iniversel. Lane dernye li ti kennsel gradyelman totalite pansyon iniversel, fer li sorti laz 60-an, fer li aplike zis apre 65-an. Sa li ti lur pu tu fami ki travay pu viv, e li ti pli lur pli u fer travay lur, pli u mizer. Sa ti premye atak kont klas travayer.

Kan ti ena imans manifestasyon dan Port Louis tutswit apre Bidze lane dernye, sa «konsesyon» la ti enn bom-a-retardman deza poze pu sa lane la. Li ti efektivman amande pu introdwir konsep «means test», pu abitye dimunn ar “prinsip” siblaz. Kan enn dimunn ti ariv laz 60-an apartir 1 Septam 2025, li ti kapav fer demars pu tus enn Alokasyon Rs 10,000 dapre kriter. Sa vedir dimunn ti bizin al divan Minis Sekirite Sosyal, pruve ki li mizer. Li enn sistem «means test» kot imilye dimunn, fer dimunn vinn pled febles. Seki ti enn drwa iniversel, seki ti donn Parti Travayis glwar pandan tut long so listwar, li-mem li finn kraze. Sa «poor law», setadir «means test» ki ti responsab sulevman nasyonal an 1937 ek 1943, e finn amenn pansyon iniversel plitar, finn re-introdir par Ramgoolam, Jnr.

Nu pu rapel kan Guvernman MSM-MMM ti sey tir pansyon inivesel apre so eleksyon lan 2000, ki PT Ramgoolam finn gayn eleksyon, revinn opuvwar lor platform pu re-etablir pansyon vyeyes iniversel, mintenir li kuma enn DRWA INIVERSEL.

Ramgoolam ti mem amenn argiman anfaver iniversalite. Se sa ki ti fer li eli. E zordi kan li vande lor la, sa pu amenn so defet politik. LALIT pe predir sa.

LALIT finn fer iniversalite pansyon, ek iniversalite lezot servis sosyal, enn pilye nu program. Nu finn sibit enn ase long kanpayn kont nu lor sa size la. Me, avek travay manb LALIT ti fer dan All Workers’ Conference, ansam klas travayer finn tom dakor ant 1995 ek 2000 ki nu opoz, e pu opoz, «means test». Finalman, enn eleksyon finn vinn lor sa pwin la. Guvernman Travayis, apre so eleksyon an 2005, mem dan diskur 5-minit, kan Ramgoolam proklame Depite eli, li ti dir pansyon vyeyes pu revinn iniversel.

Pa pu bizin ranpli form. Sa exersis imilyan, kot 120,000 pansyoner alepok ti bizin kumans ranpli form ki MSM-MMM ti’nn introdir, inn disparet.

Kumsa ki LALIT, ek lansanb muvman sindikal o-nivo totalite delege tu federasyon, dan enn 18 diferan imans Konferans, finn kapav infliyans azanda sa kanpayn la an 2005, e mem infliyans prosenn guvernman ki ti sorti ladan.

Apre sa premye atak, Minis Finans Ramgoolam, sa kut, vinn minn sistem pansyon vyeyes iniversel avek baton dinamit, vinn poz bom-a-retardman dan lalwa ki pu atak klas travayer dan lavenir, kan Guvernman pu rod pey mwins dimunn zot pansyon atraver sanz sif pu kalifye.

Pansyon nepli enn drwa otomatik, kan u gayn 60-an ubyin mem kan u gayn 65 an. Sak vye dimunn pu tus enn pansyon:

(1) dapre laz li opte, setadir swazire individyelman, kan li pu tus so pansyon ant laz 60-an ek 70-an, e kantite li gayne pu tant li pu pran retret plitar, plito ki pli boner

(2) dapre reveni ki li gayne apar so pansyon vyeyes, ki nepli iniversel.

Nu explik sa 2 pwin la :

Laz Pansyon

Laz Pansyon vyeyes nepli enn drwa iniversel pu okenn vye dimunn. Li varye. Laz pran pansyon li-mem nepli fix ! Enn dimunn kapav pran so pansyon kan li ariv 60-an me sa pu diminye so pansyon kan e si li gayn so pansyon kan li ariv 65-an. Kan enn dimunn ariv 60-an, li kapav pus so laz pran so pansyon ziska li gayn 70-an. Sa pu azut pwin dan so pansyon a 70-an. Alor, pu ena enn rediksyon dan u SAP (State Age Pension) si u opte pu pran u pansyon kan u gayn 60-an, setadir avan laz pansyon ki ti fixe a 65-an, e pu ena enn ogmantasyon SAP si u opte pu pran u pansyon pli pre ar 70-an .

Pruve ki u Mizer, pena Reveni

Som pansyon vyeyes pu ena «means test» .U pu bizin pruve divan Guvernman ki u pa pe resevwar reveni dan furset ant Rs 15,000 ziska Rs 50,000, e si wi, lerla u pansyon pu kupe apartir u reveni ki plis ki Rs 14,000, e ziska Rs 50,000. Apartir reveni Rs 50,000 nepli pu ena pansyon vyeyes.

Guvernman Ramgoolam pretann ki li inposib pu li servi «claw-back», setadir, taxe dimunn ki tus plis ki enn som atraver zot inkom-tax. Sa vedir li pretann ki so Guvernman pa zis pena lespri, li pena laservel. Li pe azir kuma enn “ti-kontab” san kapasite reflesi. E sa osi byin ki lefet ki li pe azir san okenn santiman pu dimunn dan klas travayer, ki viv lor tipti reveni. Pu Ramgoolam & Co, si u kapav sirviv lor ti reveni, u kapav sirviv lor mwins ankor. Purvi pa tus reveni dividenn e gro lintere.

Demand LALIT propoze ki Klas Travayer Tom Dakor

1. Tax progresiv pu, dabor, finans pansyon, e osi pu finans welfer-steyt an-zeneral.

2. Guvernman fors klas kapitalist investi dan prodiksyon, e dan kreasyon anplwa pu dimunn ki laz travay ki res dan Moris. Sa bizin sirtu dan suvrennte alimanter (tablisman bizin investi dan lagrikiltir gran lesel – dizon enn-tyer so later – e dan prodiksyon alimanter gran lesel, proprieter lotel bizin oblize investi dan lapes gran lesel lor tu sa 2.4 milyon kilomet kare nu losean). Si patron pa dakor, Guvernman bizin investi ladan. Anmemtan, CEB bizin prodir lenerzi renuvlab dan enn fason zeneralize, li-mem.

Mobilizasyon

LALIT fer enn apel pu ki tu dirizan dan muvman sindikal mobiliz lansanb tu so delege, e lerla sak delege mobiliz sak manb, lor enn demand kler pu fors sa Guvernman Ramgoolam avek so alye pu retablir sistem pansyon iniversel, e pu lans prodiksyon dan sa pei la. Sinon guvernman bizin ale, apel nuvo eleksyon zeneral, lor sa baz la, e lor baz sa program ki lansanb sindika fini dakor: Ferm baz Diego, reklam reparasyon depi UK-USA pu lokipasyon ilegal, refer Repiblik Moris vinn «non-aliyne», e donn kudme aret sa zenosid ki Israel-USA pe perpetre dan Palestinn, e ki pe elarzi dan Liban. E Guvernman bizin opoz sa lager-dagresyon ki USA-Israel pe fer kont Liran.