À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Trwa zenn kamarad ape alonze

Lor enn ti lili dibwa kraz-kraze.

Enn sandriye plin ar mego, ti K7 ti lamizik.

Enn ti trou dan plafon lao,

Ou kapav tour sa komik,

Zot santi zot bien!

Dan lasam akote gran dimounn pe bwar.

Televizion pe zwe sipaki zistwar.

Zenes pa kas latet ar sa,

Enn ti dialog deroule

Ti lamizik met zot dan nisa,

Zot pe santi zot oke,

Sakenn so lemond!

Pourtan sa trwa zenes-la zot napa fami.

2 mam ladan inn vinn get zot lami.

Ala difikilte transpor,

Lami-la dir zot ploye

Lapli ti ape tonbe for-for,

Zot inn oblize reste

Pou zot touy lanwit.

2 ti dipin sardinn ek pima konfi,

Dan lakouzinn ti ena inpe bred arwi.

Ti rougay poson blan avek enn ti toufe ziromon,

Apre zo’nn lav zot lasiet korek

Zot boyo finn fini ron,

Kraz enn ti taba!

Aster zot pe alonze, zot pe rakonte.

Enn ti kankrela detanzantan pe pase.

Enn gro trou dan moulton sa pa fer nanye.

Zot napa kas latet ayo,

Ti lili finn vers enn kote,

Lezar ape get zot lao,

Zenes pa pe trouve,

Sakenn pe rakont so morso,

Pe riye koze badine.

Ti moulton ape fer zot gagn so,

Taler zot pou ploye,

Legliz ape sone 11-zer,

Me pou zot na pena ler,

Dan zot ti lemond bien mizer,

Zot inn trouv enn bout boner.

Zoli levazion!

25.06.1980

Bio

Madaya Condeah.

Passionné de langues – en particulier du «Kreol Morisien» –, de théâtre et de linguistique, il a été enseignant de français et d’anglais. Amateur de musique classique et de jazz, il a été le lauréat du premier «Konkour Lekritir Teatral Pri Dev Virahsawmy» en mars 2026.