Prezidan Amerikin Donald Trump finn deklar lager kont Liran. So zandarm Israel ki li finn large pou avoy premie misil kont Liran. Sa lager-la ilegal. Agresion li enn krim de ger, premie krim de ger. E sa agresion kont Liran li agresion kri. Sa lager-la pena okenn rezon, ni pretex. Li tou sinpleman enn lanpir ki pe grene, degringole, fer dominer. Ti-mama Trump dir so bi lager se pou anpes Liran ena akse a matier nikleer, sipa zarm nikleer. Ti-mama li dir li fini demoli Liran so prodiksion nikleer. Ti-mama li dir fode pa Liran ena misil pou defann li kont Israel. Ti-mama li dir Liran pena drwa ena alie dan rezion. Ti-mama li dir Liran fourni terorist, kan li anfet enn pei ki finn lite kont pli gran terorist, kouma Al Qaeda ek ISIS. Ti-mama, Trump dir se li, pa lepep Liran, ki bizin deside ki rezim ena dan Liran.

Me li kler ki li pa finn gagn okenn desizion Kongre Leta Zini pou fer lager. Li kler ki pa finn gagn okenn rezolision Nasion Zini pou li deklar lager. Li kler dan tou sondaz 2/3 Amerikin kont enn tel lager kont Liran. Sel verite: Lobi proIsrael li finans 2/3 manb Kongre, e Israel oule sa lager-la. Bi iltim Israel se pou morsel Liran, kouma li finn e pe morsel Palestinn, Liban, Soudan ek Lasiri.

Anplis, ankor enn fwa, Leta Zini koupab enn krim de ger adisionel, seki apel “perfidi”, setadir instal enn latrap atraver zafer kouma negosiasion pou lerla fer tret, atake.

Trump finn deza fer tret anver so prop elektora: dan so kanpagn elektoral li ti promet “lafin lager sanfin” (the end to forever wars). Zordi li finn deklans so “Firi epik”, enn non osi imoral ek ridikil ki “shock and awe” (sok ek lorer) kont Irak.

Fas a tou sa imoralite-la, tou sa ilegalite-la, Liran, par kont, pe azir dapre lalwa internasional self-defans. Li finn dir li pou defann li, e li pou sible plas kot ena baz Amerikin, navir Amerikin, osi bien ki kont-atake kont Israel.

Lamerik ek Israel finn atak sib dan 6 lavil dan Liran.

Liran finn reponn ar explozion dan pei kot ena baz USA, setadir Kuwait, Bahrain, UAE, Qatar, Larabi Saoudit.

LALIT dir Gouvernman Moris bizin pran pozision kont sa agresion par Leta Zini ek Israel kont Liran, e bizin met an gard kont servi teritwar Repiblik Moris dan sa agresion ilegal-la.