À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Asize aswar divan bwa nwar

Degoute fatige ar palab gran nwar

So lapo kitfwa inn gagn lor

Ar tou so bann tit trofe ek PhD

Kitfwa li panse li inpe pli gran

Ki bann zanfan pa konn konte

Lavi inn amenn konesans sazes

A bann ki oze imilie zot divan Kreater

Parfwa, enn soupir gran fezer

Lev nene divan lezot zot «klas»

Ki imin mem inn mete...

Kan Segner finn kre konsians

Linn vinn ar seki inferyer ek siperyer

Me parmi nou bann zom lor later

Nou pena drwa ziz enn lot par so ran

Lintelizans ek fakilte depann lor sakenn

so kapasite

Eski enn lisien kapav naze?

Eski enn fourmi kapav danse?

Wi, nanye pa inposib

Me sakenn ena so fonksion lor later

Kouma sa labourer ki bizin trim later

Pou ki twa to manze ar kwiyer fourset

Eski enn zour to finn reflesi

Kot sa manze-la sorti?

Ki lalit sa travayer-la inn fer?

Ki ler li finn leve boner gramatin?

Ki trasman ek sakrifis li finn fer

Siklonn soley

Tousala, eski to resanti ek kone?

Ou bien to zis trouv enn pla bien

prezante

Ki twa to nek degiste?

Labourer ena mwins egoism

So letan ar koneksion dan lanatir

Rann li telman tipti

Ki twa to oze denigre li

Parski twa to ena enn PhD.

Bann zanfan site napa bann boufon

Ki to gagn drwa denigre

Enn zour oz pran enn sifon

Ek al souy enn dimounn malad so lipie

Lerla ar enn tigit lasans ek lagras

Limilite pou devers lor twa

To pou konpran a ki pwin nou tipti

Ek nepli ler pou fer mari

Later pe abazourdi ek degringole

Akoz imin so mentalite

Ki ler to pou aret met dife

Ek anfin koumans pans dime?

Olie to tap lestoma

Trap lame enn ti baba

Montre li kouma li kapav grandi

Pa tom dan fleo

Tini lor so prop lipie

Twa ar to PhD to pe rebele

Atann gete si lager eklate lor later

Moris

Ver kisann-la to pou tourne

Si zame to pena manze...

Pran to konesans ek ofer li a to zil

Kitfwa lerla to pou gagn rekonesans

Kan to ler pou arive pou dekol depi isi

Fer en sort ki to pa bril sa zoli sans

Ki tonn gagne pou fer le bien...

Wi, fer le bien

Pa fer ditor to prosin

Copyright ©️ 2026 Ingrid Leste

Bio

Ingrid Leste

Also known as Janamodini, she is a multipotential artist. In 2018, she has created “Vwayaz Within”, a concept where she proposes a sound journey through the didgeridoo and art.