À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Langaz kreol, langaz mama

Tonn fer mwa resanti douser

To ti avek mwa lannwit lizour

Monn grandi avek twa

Atraver twa ek akote twa

Langaz kreol, langaz identite

Tonn donn mwa mo dinite

Mo fierte, mo lapartenans

Tonn donn mwa bann mo pou kapav exprim

Mo lazwa, mo lapenn, mo koler, mo traka

Langaz kreol, langaz lakaz

Avec twa mo pli alez

Akoz twa lezot konpran mwa

To donn mwa kouraz pou mo defoul mwa

Pou dir avek odas seki dan mo leker

Langaz kreol, langaz lanfans

Tonn avek mwa depi monn apran gazouye

Tonn trap mo lame depi mo premie pa

Tonn montre mwa kouma demann seki mo oule

Atraver twa lezot inn donn mwa lamour ek gidans

Langaz kreol, langaz lamitie

Monn aprann akey lezot dan mo lavi

Tonn donn mwa mo bann premie koneksion

Atraver twa monn konn fer kamarad

Monn kapav kominik konfians ek lintimite

Langaz kreol, langaz lamour

Premie fwa li ti dir mwa mo konte pou li

Sete dann enn let roz

Li ti devers so bann santiman pou mwa

Li ti servi twa kouma sipor

Langaz kreol, langaz kreasion

To bann expresion zot serye

Zot zoli, zot dou, zot familie

To inspir mwa pou partaz seki

Pe pase dan mo bann panse, dan mo lespri

Bio

Abeenaaz Janally

The author of “Peich o Kham”, a collection of Urdu Short stories, she is currently a BA (Hons) English student at the Open University.