À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Pou enn kamarad imin

Imin finn pran larout ki li ti abitie pran,

finn mars dan kwin

ek finn pas devan so pie prefere.

Enn madam inn kriye li.

“Eyy, to sak ouver!”

Sirpri, imin finn verifie vit.

“Aieee, get sa! Me wi mo sak ouver!”

Trakase,

parski linn perdi de-trwa papie,

linn ferm so sak.

Imin inn fer enn poz,

linn sagrin.

Pa parski sak-la ti ouver.

Me parski enn zafer finn glise

san so permision,

san li kone.

Li dir li mem,

“Enn mo papie finn perdi.

Enn ti bout “mwa” finn ale,

asterla li apartenir a lari.”

So lame ti res lor sak so zip,

li ti pe ezite.

Ek apre,

enn zafer ki li pa ti pe atann inn arive.

Madam-la finn retourne,

linn fer enn sourir,

linn met enn papie pliye dan imin so lamay.

“Monn trouv sa zis deryer twa,” linn dir.

Imin ti santi li soulaze.

Lamem imin finn konpran:

ki lame serre tro for

pa kapav resevwar.

Ki enn sak touletan ferme

zame fer plas.

Les ale

se pa enn pert,

me enn linvitasion.

Anou ouver nou lame.

Larg seki pez lor zepol.

Larg seki nepli ekoute.

Parski seki sipoze retourne

pou trouv so sime retour —

ek seki pa pou twa,

li fer lespas pou enn zafer pli zoli.

Kamarad imin,

les ale, pou resevwar.

Bio

Rebecca D’Souza

An kolaborasion avek Caudan Arts Centre, Rebecca pou anim bann latelie lekritir kreatif pou adilt en avril 2026. Li oter “89 Questions to the Moon”.