À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier en cette journée de célébration de l’Indépendance.

Mo bann frer ek ser, bonzour, Nihao, Vanakkam,

Namasté, Assalam alaikum

Si zordi nou indepandan se pa gras a enn sel lame

Mo kone ena 1-2 pandan ki zot pe lir sa

Zot a pe pran liberte pou aki

Pa rann kont sa pwa ki nou bann zanset finn sarye ziska zot tom

Pou ki zordi nou otonom

Pa pe bizin swiv lamonarsi, pa pe bizin swiv enn rwayom

Enn gran mersi a tou saki finn lager pou nou lindepandans

Le 12 mars 1968

Kot Champ-de-Mars pavion Moris finn pran swit

Divan ‘le père de la nation’

Inn fer Deklarasion de lindepandans

Drapo Langleter de nou kolonisater finn met a ter

Pou mont pavion kat kouler de nou later Moris

Enn nouvo sapit dan listwar finn koumanse

Ek li an kouler sannla

Rouz Ble Zonn Ver

Anou Bouze, Rezonn vers enn Moris meyer

Viv nou kreolite

Tou kreol viv dan linite

Pou kreol wi nou pou lite

Dapre mo analiz, Morisien kontan swiv tandans Amerikin ek zot apel

sa modernite, ena mem apel sa liberte

Nepli ena orizinalite, okenn otantisite

Nou a pe perdi nou idantite

Bann zenn pe nek swiv bann ‘trends’ ki pe antrenn nou pei ver enn..

sime dead-end

Kreol zot pe ezite pou zot koze

Pli pir ena pa pe konn koze

nou kiltir an perdision zoto

Atansion li an disparision kouma dodo

Nou kiltir bizin konn preserve

Nou leritaz bizin konn proteze

Nou zistwar bizin konn propaze

Nou valer bizin konn partaze

Mwa mo fini dir

Kouma mo perdi mo... rises, nou fini perdi Mau..ritius

Nou ena enn diaspora ris

Enn sosiete multirasial kot tou kominote viv dan larmoni

Nou diversite nou viv li a traver nou bann zoli kiltir ek tradision

Fizion nou lamizik ek nou lakwizinn

Moris to mem nou nonbri, nou rasinn

Mo pou fer to non briye kot mo ale

Avek fierte mo pou riye mo pou kriye

Mo enn Morisien

Mo fier de mo lidantite

Mo nationalite

Vive nou ti zil Moris

Vive nou lindepandans

Hip! hip! hip! Hooray.

Bio

Pouvalen Pareanen

De son nom de scène Thoth24, il est un poète et slameur de 22 ans qui utilise son art pour questionner la société et susciter le dialogue. Avec une intensité brute et une plume percutante, il transforme ses expériences en performances engagées, abordant des thèmes comme la justice, l’identité et la résilience. Convaincu du pouvoir des mots, Thoth24 voit la poésie comme un moyen d’éveiller les consciences et d’inspirer le changement.