À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Fam

Mo enn fam

Enn sinp fam

Mo pa enn dekorasion, ni enn obze ou

mem enn trofe

Souvan zot dir mwa, «Eyy zis to bote ki

ena valer? Pa to parol?»

ou mem,

«Kifer to egri koumsa? To pre pou gagn

to peryod?»

Me le 8 mars mo lev mo lavwa

Pa pou vinn fer dezord

Me pou montre zot nou lindepandans

Mo sansib me mo pa frazil

Mo dekouraze me mo pa abandone

Mo tonbe me toultan mo relev

lor mo de lipie

Nou port lavi, lafors ek laper

Mo pa pe demann twa bouke

Me respe

Mazinn bien deryer sak zoli figir

ena enn konba

Enn zistwar kouraz ki to pa trouve

ek kone

Mo pa enn poem me plito enn poet

Ki pe ekrir

So prop zistwar atraver konba

Get mwa pou seki mo ete

ek non pa pou mo bote

Akoz wi mo bote

se mo lindepandans

Bio

Grace Keren Larose

Étudiante au Belle-Rose SSS, elle est passionnée de poésie et de slam.