Publicité
Plumes engagées
Ti bout papie
Par
Partager cet article
Plumes engagées
Ti bout papie
Geraldine Baptiste.
À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.
Ti enn ti lasware
Bien aroze
Li ti tante
Par sa bout papie
Ena dir li lapoud mazik
Zot tou konn li kouma sintetik
Dan linn ris enn ler
Li finn trouv lanfer
Pourtan zot ti dir li
Ki lefe-la li zis efemer
Pas 2 semenn
Li koumans trouv zekler
Lerla mem bann problem
Vinn fer sirfas
Zis akoz enn ler
So latet nepli anplas
Avek letan linn perdi larezon
Li bizin sa pou redres lekor
Sak fwa li dir li pou arete
Latet fatige li rekoumanse
Ena zour li rod zete
Li pa oze
Li per seki ena lot kote
Komie fami zordi pe soufer dan silans
Zot kotidien inn vinn enn penitans
Adiksion pa get ras ni relizion
Pir li pa tous zis enn zenerasion
Dan lespas 3 minit
Kapav li ti enn parti plezir
A la long sa pe vinn enn vilin martir
Komie pe kokin pou enn doz
Ena konsome ziska overdoz
Mama lot kote pe plore
Zanfan dan kwin isi pe kime
Marsan lamor pe ramas biye
Nepli kone ki sime pou ale
Nepli kone ki laport pou tape
Enn bann rezon
Kifer nou bizin kontinie sansibilize
Mobilize
Pou ki to zanfan, mo zanfan
Pa afekte
Enn mesaz inportan
Reflesi 2 fwa avan to konsome
Sintetik, kokainn, eroinn
Pa enn zwe
Li plito met twa dan trez
Pir avek letan to lekor vinn dan bez
To ena to lavi devan twa
To kapav amize otreman
Get bien to lantouraz
Ena la pou met twa dan trou
Ziska rann twa fou
Pa tou dimounn lor later
Ki kontan to boner
Meyer fason pou lak twa
Se zis ek enn doz
Pran to prekosion
Pa nek aval tou pwazon
Ti enn lasware bien aroze
Li ti tante par sa ti bout papie
Ena dir li lapoud mazik
Zot tou konn li kouma sintetik
Lor so volan
Li ti pe plane
Enn ti bolfam pase
Li pann reisi arete
Deryer baro
Li pe inplor so pardon
Parski li pann ekoute
Kan so mama finn koze
Bio
Geraldine Baptiste
Slameuse au nom de scène Ge-NYX, cette habitante de Roche-Bois aime écrire des textes plus ou moins tabou... La poésie, c’est sa thérapie.
Publicité
Publicité
