À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier en cette fête de l’Indépendance.

Mwa Morisien, mo sort dan site

Ek mo bann vwazin nou ti pe zwe lor sime

Pa ti pe gete ki ti nou kominote

Lor terin Pepin ki monn aprann mo ti-milat

Pa fouti kone kifer ti pe apel mwa koumsa

Pli tar monn dekouver ena malbar, laskar, sinwa

Zame mo ti konpran sa bann zistwar-la

Kifer get figir, kominote, relizion ar sa bann-la

Koz kreol pa bon, koz franse gran nwar beta !

Lorla, azout kategori lekol. Ziz twa lor kolez

To Royal, Lespri, QEC, Loret, to bon

To Eden, Patten, London, sipaki, to pa bon

Laparans pli inportan ki to konesans

To savat Dodo ? Koz kreol ar twa

To kravat, kalson, loto ? Koz bien ar twa

Me, nou tou nou manz briyani, bwar alouda

Nou tou nou konn Dewa, al kot Vona

Nou tou nou tous sali, met gamat

Seki fer nou Morisien se nou metisaz

Se rises nou langaz

Pe inport nou laz

Nou tou nou diferan dan nou ti-lil

Sa ki fer nou lafors, ki nou Surinam ou Rozil

Ki nou kreol, blan, malbar, laskar, sinwa dan zil

Ti apel mwa ti-milat, mo sort site Vuillemin

Mo apel Jean-Yvan, monn ne Bobasin

Mo fier mo Morisien

Mo pei ena sipa komie lan

Li indepandan

Me eski nou lespri indepandan ?

Bio

Jean-Yvan Marechal

Concepteur-rédacteur, trailer passionné et peintre inspiré, cet ancien journaliste et communicant, amoureux de la nature et des récits vrais, conçoit aujourd’hui des messages, peint des paysages et court souvent entre les deux. Le temps lui a appris que chaque jour est un cadeau qu’il faut déballer lentement.