À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

STEPHA… al kontigne li

Mo apel Stephanie

Kas enn poz ekout enn parti mo lavi

Pou mo mama mo res so tifi

Pou mo papa mo pou res touzour tipti

Pou mo gran frer monn bien grandi

Me mo ankor tipti akote li

Met nou ansam apel nou enn fami.

Pa bizin dir zot fami grandi

Mo dada inn vinn cheri

1 an plitar cheri perdi

Kot to pase to tann zis papi

5 an plitar mo lor mo lili

Enn deryer lot: tati tati

Pa fini pli zoli tipti li pli ardi

Koumadir mo ti zwe kanet ar li

Fanny… to pe dormiiiii

Pa gagn kriy ar li… tro mimi

Pena pou precize ki dan mo kote mo ena mo proze

Mo tour arive san realize mo non sanze

Kouma tou koup nousi nounn reve

Me malerezman 6 an apre plizir ese me touzour a 2

Me nou pa prese nou pozitive

Li vre parfwa mo decouraze

Ofon de mwa mo soufer an sekre

Me mo aksepte lao-la ki deside

Zot kapav pa trouve me li dan mo kote

Apre pa panse bizin prokree pou materne

Seki kone kone, pou zot zanfan mo tombe leve…

Enfin bliyeee… nou kontinie

An gro vwala pou mwa definision de lafami

Mo ti fami kinn agrandi peti a peti

Ena pou dir be aster se to mari to fami

Wi wi zame monn dir li pa inkli

Me mwa mo onor mo zenealozi

Parski san li mo pa ti pou mem ena lavi

Mo mesaz pou zordi

Se sinpleman enn gran mersi

Mersi mami tonn donn mwa lavi

Mersi papi tonn fer mwa grandi

Mem si parfwa zot inn afebli

Zot lasiet pa ti toultan ranpli

Zot inn manz ar li kom promi

Zot sakrifis inn abouti

Get nou zordi zot kapav aplodi

Malerezman pou ena enn zour kot tousala pou fini

Me gard sa bien dan zot lespri

Mami Papi antan ki paran zot in reisi…

MERSI…

Bio

Stephanie Victor

Passionnée par la musique, l’écriture et le slam, elle espère toucher les cœurs et les âmes à travers ses écrits.