À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Enn sourir ti desine lor so vizaz

Enn boul lenerzi

Ki ti amenn lazwa dan so fami

Li pa ti parfe

Ek so karakter defwa so mama

Ti fer letour dife

Li ti zis enn ti mamzel,

Enn ti gazel ki ti pe profit lavi

Li ti touletan bien antoure

Ek so bann kouzin, kouzinn

Li ti osi mo ti vwazinn

Li ti ena enn par mister

Ki mem so ser

Pa ti kone

Li ti la ek so sourir

La ek so bann delir

Aster ena zis souvenir

Kan maler vini

Li pena parfim

Nimpor ki ler ki minit

Li atak nimpor ki imin

Ki to tris, malad, zovial, amoure

Si li pas par la

Kone ki to pa pou trouv landime

Enn sourir ti desine lor so vizaz

Enn bouke fler

Ki ti pe fleri dan so zardin familial

Pou so papa li ti enn zetwal

Dan sa liniver infini

Pou so frer li ti sa ti roz

Ki so petal rest tini

Pou so ser, so mama

Li ti enn reyon soley

Ekseptionel

Pourtan lemal

Ti pe atann li

Kan desepsion vini

Li pa tap lapor

Li pas par lafnet par linpos

Li nwarsi ou leker

Li anprizonn ou lam

Li transpers ou lekor

Dan sa ler

Pa esay rod enn explikasion

Zis lakord ki ti ena rezon

Ziska ler

Personn pann resi konpran

So aksion

Ek li nepli la pou reponn

Nou bann kestion...

Bio

Geraldine Baptiste

Slameuse au nom de scène Ge-NYX, cette habitante de Roche-Bois aime écrire des textes plus au moins tabou... La poésie, c’est sa thérapie.