Le mercredi 3 décembre, la Journée mondiale des personnes handicapées a été célébrée au MGI, à Moka, en présence du Premier ministre Navin Ramgoolam et de plusieurs autres invités, dont Noemi Alphonse (photo), la championne paralympique.

Cette dernière a ému l’assistance avec un discours puissant et émouvant : «Zordi nou pa zis selebre enn dat lor kalandriye, nou pe selebre dignite imin, kouraz, rezilians, lamour ek determinasion. Kan enn zanfan ne, lavi enn paran ek la fami sanze. E ki li ne avek ou san andikap, enn zanfan res enn kado presie. Enn dimounn avek enn andikap, enn zanfan kouma enn adilt, li res enn imin avan tou. Enn sitwayin à part entière, avek so bann drwa, so bann kapasite ek so bann rev. Nou pa pe dimann pitie, nou pa pe dimann privilez, nou pe dimann respe, egalite e mem lasans dan lavi. Get nou kapasite avan get nou andikap.»

«Azordi Moris ena plizier model ki fer nou fierte, kouma Jane Constance, Yovanni Philippe ek Yasseen Edoo. Sa bann lexanp la montre ki andikap pa anpes limanite briye. Nou pa ena drwa dir ki nou pa kapav parski nou andikape. Nou bizin kre nou prop loportinite mem si ena touzour boukou baryer.»

«Ek deryer sak zanfan avek enn andikap, ena ban paran extraordiner, paran ki krwar mem kan bann lezot pa krwar, paran ki batay an silans, ki sakrifie, ki krwar dan enn sosiete meyer pu zot zanfan malgre tou. Zot lamour li san limit ek fer montagn bouze.»

«Nou pa apar, nou pa en tro…»

«Dan nou bann lekol osi ena ban dimounn ki merit enn gran rekonesans. Bann profeser ek edikater dan lekol SEN. Zot pa zis transmet savwar, zot transmet konfians, respe ek lespwar.»

«Me malgre tou sa lenerzi, tousa zefor, an 2025 ena bokou baryer ankor dibout, transpor pa adapte, trotwar pa aksesib, batiman pa inklizif, regar dimounn parfwa ranpli avek zizman, ek mank konpreansion. Parfwa nou integre kan sa aranz zot… Nou merit nou plas dan sosiete parey kouma tou lezot sitwayin, nou pa apar, nou pa an tro, nou à part entière.»

«Nou bizin ki lalwa respekte, avek sanksion ferm kont ban ki mepriz nou drwa. Sa bann aksesibilite la se pa bann faver, se bann drwa. Nou bizin edik nou zanfan depi zen az pou krwar dan diferans. Aret get nou kouma dir nou enn bête de foire, nou imin avan tou. Nou sitwayin, nou Morisien. Mo poz zot enn kestion sinp me profon, si mwa Noemi Alphonse, si mo pa ti championne du monde, eski mo ti pu gagn sa mem regar la, eski mo ti pou merit mem respe?»

«Nou krwar dan enn Moris pli zis, pli inklizif, kot sak zanfan, sak zenn, sak adilt kapav krwar dan so rev. Sa Moris la li pa enn rev lwin, li repoz lor ban desiyon ki nou pran azordi. Mesdames et messieurs, le handicap ne doit plus jamais être un frein à la dignité, à l’égalité et à la réussite. Nou krwar dan sanzman, nou krwar dan enn Moris pli imin. Nou andikap se nou fierte !»