Publicité
Plumes engagées
Kaya
Sandrine Russie.
À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.
Mo lekritir pa ase for
Pou komemor to talan
Ek selebre to lamizik
Mo finn galere pou mo trouv parol
Me mo ti telman anvi ekrir ki mo pa finn abandone
Sak fwa ki to ti sante
Nou ti pe vibre
To bann lakor ti amenn frison dan nou lekor
Ek nou ti toultan pe rod ankor
SIME LALIMIER to finn montre
Pou ki nou ti zil prospere
Zordi mwa ti FAM DAN ZIL mo pe rann twa enn omaz
Mo trouv sa domaz ki to finn kit nou
A la fler de laz
Parski enn bann sovaz pa finn konpran to bann Mesaz
Ek enn bann RAS KOUYON ti pe rod division.
Wi Kaya le 21 Fev,
personn pa ti kone sipa enn dram
Ti pe zwe.
Boner gramatin nouvel tonbe, to finn ale.
Pourtan lavey to ti an bonn sante
Nouvel to lamor
Finn amenn boukou remor
Ek finn fer boukou ditor
To zanfan finn plore
To fam finn plore
Enn lanpir iniversel osi finn plore
Parski Kaya to pa ti merit
Sa kalite tretman ki to’nn andire
Kan to lekor finn expoze
Lepep finn santi li revolte
E se lerla ki enn bann finn profite
Pou alim dife
Nou ti pei finn anbraze
NOU RASINN ti pe BRILE
Boukou fami finn bizin sove
Zot lavi ti andanze
Koktel molotov, kout ros, piyaz dan vilaz
Boukou zafer finn deroule
Pourtan mo ti enn zanfan
Me Souvenir pa le ale
Li reste
Wi se enn ZISTWAR REVOLTAN
Ki mo pe rakonte sa 21 Fevriye-la
Pou bann ki pa ti ankor ne
Mo espere ki sa pa pou repete
Nou enn pei arkansiel
Fode pa nou bliye seki esansiel
Setadir lamour ek larmoni.
Fode pa nou bliye bann ki finn ale osi
Twa Kaya me Berze Agathe osi
Li ti pe dir NON A LAVIOLANS ek
Pres lape me
So lavi finn anvole
Kan bann bal fane finn tous li.
Mo santi mwa afebli
Kan mo remazinn
Tousala me mo bizin rakonte
Pou ki dimounn pa bliye
Avan mo ale
Mo remersie twa kaya
Pou tou seki to’nn aporte
Mo sir ki lao kot to ete pre ek SOLEY EK BONDIE
To pe kontign briye
Ek sante
To lamizik pou toultan rest grave
Dan mo panse
Bio
Sandrine Russie
Cette enseignante au collège BPS Fatima est maman de trois enfants. Elle n’est pas de celles qui aiment poser leurs émotions sur le papier car chaque mot, phrase reste à jamais gravé dans un beau jardin de souvenirs. Pourtant, pour Kaya, les mots coulent.
Publicité
Publicité
Les plus récents
