<B>Pa melanz kalchoul !</B>

Dan laparey leta ena de kalite post : nominasion politik ; travay dan servis sivil. Bann prensip pou selekte dimoun pou sa de kalite post la li pa mem zafer.

Kan enn gouvernman swazir dimoun pou post Prezidan ou Vis-Prezidan Repiblik, bann diferan post konstitisionel, anbasader, dirizan kor paraetatik, konseye dan diferan minister, atasedpres ets, li swazir parmi dimoun ki li fer konfians (...). Sa bann dimoun la zot kontra moralman termine kan gouvernman ki zot soutenir e pou lekel zot travay finn perdi pouvwar. (...) Travay dan Servis Sivil sa li enn lot zafer. Prosedir rekritman li diferan. Ena bann enstitision kouma PSC ki okip sa. Enn lalwa Equal opportunities (EO) pou sirman amelior sitiasion me nominasion politik pou res andeor kontrol sa lalwa la. (...) Bann aktivis Kominote Kreol pe dir ki zot pa pe gagn dapre drwatir. Eski PSC pe tay zot palto ? Si sa vre li bien-bien grav. Me si zot pe dir ki Kominote Kreol pa pe gagn ase nominasion politik sa li enn lot zafer. Dan dernie eleksion enn bien-bien gran poursantaz Kreol (EroKreol ek AfroKreol melanze) ti soutenir Lalians MMM-MSM. Enn bien ti-poursantaz ti vot pou Lalians Sosial. Pa bizen tike pou get realite. Bann depite Kreol Lalians Sosial ti eli ar vot lezot kominote. Eski li pa normal ki bann nominasion politik swiv kontour realite politik ? (...) Kot nou bizen extra vizilan se dan domenn rekritman pou travay dan Servis Sivil. Kalifikasion ek konpetans pou bizen res kriter fondamantal. Lalwa EO pou ed nou avanse lor sime lazistis. Me malgre sa mo trakase parski bann AfroKreol, si zot pa fer atansion, riske tas lor poto. (...) Bann dirizan ek aktivis AfroKreol bizen fer ledikasion vinn zot preokipasion priyoriter. (...) Mo repet li : PROGRAM PREVOKBEK pou ena enn gran rol pou zwe. (...) Empowerment li pas par konesans, pouvwar ekonomik, disiplinn ek dinite. Fale nou chombo sans ki divan nou. Si nou aret melanz kalchoul mo sir nou pou reysi.

<B>Dev VIRAHSAWMY</B>