Publicité
Konbat povrete
Li vre ki ena dimoun pov dan tou kominote me fale pa ki sa konstatasion la anpes nou pran konsians ki ena enn kominote ki plis dan pens ki lezot: kominote AfroKreol.
Dan kominote Endou ek Mizilman ena dimoun mwayenbourzwa, tibourzwa, proleter, souproleter ek loumpennproleter ; dan kominote Sinwa ena mwayen bourzwa ek tibourzwa ; dan kominote EroKreol ena mwayenbourzwa ek tibourzwa; dan kominote Blan ena granbourzwa ek mwayenbourzwa. Kominote AfroKreol li sirtou dan proletaria, souproletaria ek loumpennproletaria. Nou bizen konpran kifer kominote AfroKreol li «deryer midi». Answit nou bizen enn program zeneral antipovrete ek enn program spesial pou kominote AfroKreol.
Bann dirizan politik dir nou ki pou konbat povrete bizen krwasans ekonomik. Eski krwasans ekonomik fer nou avanse lor sime antipovrete? Ousa ris vinn pli ris ek pov vinn pli pov? Eski sistem neoliberal ki dominn nou pei ek nou planet pou diminie povrete ousa li pou ogmant li? Eski enn sistem ki baze lor gourmandiz (kipidite) ek egoism pou diminie povrete ousa li pou ogmant li? Eski li pa neseser devlop enn politik ki repoz lor solidarite ek partaz ?
Pou kapav partaze pou bizen taxe. Taxe ris pou ed bann pov sorti dan marenwar. Me mazorite dirizan finans ek kapital, dirizan politik, dirizan media zot kont tax. Kot pou gagn resours pou partaze ?
Kouma pou partaze ? Ena enn kouran ki panse ki bizen sible bann pov pou kapav ed zot. Bann ki defann sa lide la pe mem dir ki zot zot bann vre kamwad dimoun pov e parmi ena pe dir ki seki pa dakor zot pe rod protez zot bann. Ensilt pa enn solision.
Siblaz paret senp me anverite li konplike ek danzere. (a) Li repoz lor Lanket Lor Reveni (LLR). Angle apel sa ?means test?. LLR donn boukou pouvwar enn birokrasi ki bien vit vinn bann krazer kor. Koripsion rant brit-brit. (b) Anplis li amenn so prop imiliasion ek enzistis. Par ekzanp si nou dir ki apartir enn reveni Rs 5,000 enn dimoun pa pou gagn drwa okenn alokasion, li vedir ki enn dimoun ki gagn Rs 4,999.99 sou li pou kontinie resevwar li. Eski li bon sa? (c) So administrasion kout pli ser ki alokasion iniversel.
Si nou aksepte siblaz pou diri/lafarinn, gaz, transpor gratis ets. apre li pou rant dan lekol ek dan lopital. Souvan bann ki dakor ar siblaz zot osi pou privatizasion e zero-entervansion-gouvernman. Finalman gouvernman pou bizen donn kas firm prive pou zot sible bann pov. Apre travay lapolis ek travay prizon pou privatize e olie reabilitasion se represion ki pou vinn pratik zeneral. Lapolis prive pou fer mari dan pei e demokrasi pou afebli move kalite.
Souvan nou tann dir ki siblaz pou pansion vieyes ti enn bon zafer. Servi lekzanp Prezidan Repiblik ki tous enn bon saler anplis so pansion Premie Minis e lwaye boukou lakaz ek batiman. Me personn pa koz imiliasion ki vie dimoun ti sibir e ki ti prefer pran perdi pou evit fer fas larogans birokrat. Pa zis birokrat! Ti ena enn ex-Prezidan Repiblik ki ti tap so prop tanbour, anons ki li ti refiz pran pansion vieyes me li ti bliye dir ki li ti pe tous pansion minis ek pansion prezidan.
Alokasion iniversel li boukou pli sivilize. Li kout mwen ser ki LLR. Li plis demokratik. Li protez bann feb kont imiliasion e diktatir birokratik. Ki politik spesifik nou bizen adopte pou donn kominote AfroKreol pouvwar pou sorti dan marenwar ?
Enn reform radikal politik lang</B>
Si nou'le devlopman bann zanfan AfroKreol nou bizen garanti ki dabor zot posed literesi (lir, ekrir, konte). Pou ki nou ariv dan bit nou bizen servi bann zanfan zot lang maternel.
Nou bizen osi fer desort ki zot vinn bileng pou ki zot kapav debrouye dan lemonn modern. Kouma Angle li osi enn lang Kreol, li fasil pou konstrir bann pon ant Lang Maternel (Kreol Morisien) ek Angle. Rezilta PREVOKBEK finn fini prouv sa. Mazorite bann zanfan AfroKreol ki dan PREVOK zot pa dan kolez BEC me dan kolez PREVOK gouvernman.
Program PREVOK Gouvernman li enn mari fiasco. Bann zanfan la pa pe fer okenn progre. IRZAN: Bizen dimann gouvernman met Kreol Morisien dan bann klas PREVOK GOUVERNMAN kouma mediom lansegnman pou bann zanfan AfroKreol e anmemtan devlop lansegnman bileng Kreol Morisien ek Angle. Bann zanfan ki finn terminn PREVOKBEK zot bizen al IVTB pou aprann enn metie. Nou bizen dimann ki mediom lansegnman IVTB pou zanfan AfroKreol vinn Kreol Morisien ek ki kontinie devlop bilengism Kreol Morisien ek Angle.
Bizen ki Kreol Morisien vinn enn size pou SC ek HSC parey kouma Hindi ou Italien ou Alman. Bann organizasion AfroKreol bize met presion lor lotorite.
Dimann ki pou bann zanfan AfroKreol ki rant lekol primer zot lang maternel (Kreol Morisien) bizen itilize kouma mediom lansegnman (savedir zot aprann lir, ekrir, konte, zeografi, siyans, katesis ets dan zot lang maternel). Anmemtan zot aprann Angle kouma enn lang etranzer.
Dan lekol segonder filier normal, bann zanfan AfroKreol bizen gagn drwa etidie zot lang maternel kouma enn size. Angle pou res mediom lansegnman prensipal.
Li enportan ki pa melanz kalchoul. Lang mediom ek lang size zot de zafer separe ek diferan.
<B>Reform Agrer e Prodiksion Manze</B>
Repiblik Moris enport pli ki 80% nouritir ki nou konsome. Finn ariv ler pou met anpratik slogan "Manz seki nou prodir e prodir seki nou manze". Pou reysi sa bizen later e enn reform agrer pou permet bann desandan esklav konkerir zot dinite. Leta Morisien bizen pran responsabilite al delavan dan sa domenn la: idantifie later pou diversifikasion agrikol; kre korperative ek laferm entegre; donn formasion neseser ets.
Diskriminasion pozitiv li endispansab pou koriz erer ki finn fer dan lepase. Isi mo ti'a kontan dir ankor enn fwa ki bizen aret melanz kalchoul. Sistem esklavaz ek sistem kouli pa mem zafer. Bizen met fren ar demagozi bann kominalis primer ek siyantifik.
Ena pou dir ki Diskriminasion Pozitiv li enn form siblaz me mo pa kwar nou kapav amalgam de konsep diferan. Aret melanz kalchoul! Diskriminasion Pozitiv li pran ar seki ena pou donn seki pa ena; siblaz pran ar seki pa ena pou donn seki ena; siblaz li zanfan neoliberalism, Diskriminasion Pozitiv li zanfan Sosial Demokrasi. Siblaz li donn pouvwar enn birokrasi, Diskriminasion Pozitiv li donn pouvwar tidimoun.
Bann AfroKreol pa pou gagn nanye lor plato. Zot bizen enn organizasion for e enn lidersip eklere ki pran enspirasion dan konba Zezikri, Martin Luther King, Mahatma Gandhi ek Nelson Mandela.
<B>Dev VIRAHSAWMY</B>
Publicité
Publicité
Les plus récents
